افغان شہر جلال آباد میں حکام سے معاملات طے ہونے کے بعد پاکستان نے قونصل خانہ دوبار کھولنے کا اعلان کیا ہے۔
اسلام نیوز کی رپورٹ کے مطابق، پاکستان نے افغانستان میں بند قونصل خانہ کل سے کھولنے کا اعلان کیا ہے، قونصل خانہ کھولنے کا فیصلہ جلال آباد میں حکام سے معاملات طے پانے کے بعد کیا گیا، افغان حکام نے جلال آباد میں قونصل خانے کی سکیورٹی کی یقین دہانی کرائی ہے۔
واضح رہے کہ 29 اگست کو پاکستان نے افغانستان کے شہر جلال آباد میں سیکیورٹی خدشات کے باعث اپنا قونصل خانہ بند کرتے ہوئے کہا تھا کہ مکمل سیکیورٹی ملنے تک سفارت خانہ نہیں کھولا جائے گا۔
قونصل خانے کو ننگرہار کے گورنر کی مداخلت کے بعد بند کیا گیا تھا، صوبے ننگرہار کے گورنر حیات اللہ حیات نے 29 اگست کو قونصل خانے پر دھاوا بولا تھا۔
سفارتی ذرائع کے مطابق گورنر ننگرہار کے ہمراہ پولیس چیف اور دیگر حکام بھی موجود تھے، افغان حکام نے قونصل خانے کے بیرونی حصے کو دو جگہ سے نقصان پہنچایا۔
