دہشت گرد تنظیم جنداللہ کا انتہائی مطلوب دہشتگرد گرفتار، متعدد خودکش جیکٹ برآمد

کراچی میں سی ٹی ڈی نے کارروائی کرتے ہوئے ریڈبک میں موجود کالعدم جند اللہ کے انتہائی مطلوب دہشت گرد کو گرفتار کر لیا۔
اسلام نیوز کی رپورٹ کے مطابق، سی ٹی ڈی حکام کے مطابق گرفتار دہشت گرد محمد اسحاق عرف گل کے قبضے سے تیار خودکش جیکٹ اور 2ہینڈ گرینیڈ برآمد ہوئے ہیں۔
سی ٹی ڈی حکام کا مزید کہنا ہے کہ ملزم اسحاق افغانستان سے بلوچستان اور اندرونِ سندھ سے ہوتے ہوئے کراچی میں بڑی دہشت گرد کارروائی کے لیے آیا تھا۔
روزنامہ جنگ کے مطابق سی ٹی ڈی حکام نے بتایا ہے کہ گرفتار دہشت گرد محمد اسحاق ناظم آباد پاپوش نگر کا رہائشی ہے جو 2006ء میں کالعدم جند اللہ میں شامل ہوا تھا، وہ افغانستان سے دہشت گردی کی تربیت بھی حاصل کر چکا ہے۔
سی ٹی ڈی حکام نے مزید بتایا کہ ملزم ڈکیتی، اغوا برائے تاوان، پولیس مقابلے اور قتل کے مقدمات میں مطلوب تھا اور 2008ء سے افغانستان میں روپوش تھا۔
سی ٹی ڈی حکام کا یہ بھی کہنا ہے کہ گرفتار دہشت گرد محمد اسحاق عرف گل کے کئی ساتھی ہلاک ہو چکے ہیں جبکہ کئی گرفتار ہو کر جیل میں قید ہیں۔