نوازشریف دوسروں کو جو دکھ پہنچاتے ہیں اس کا انہیں احساس تک نہیں، چوہدری نثار

اسلام نیوز کی رپورٹ کے مطابق، سابق وزیراعظم نوازشریف کے بیان پر ردعمل کا اظہار کرتے ہوئے سابق وزیرداخلہ چوہدری نثارخان کا کہنا تھا کہ نواز شریف قوم کو بتائیں کہ انہیں میرے کس بیان پر دکھ ہوا، اگر عدلیہ اور فوج سے محاذ آرائی نہ کرنے کے بیان سے دکھ ہوا تو یہ مشورہ تو شہباز شریف بھی انہیں دیتے رہے ہیں، عدلیہ اور فوج سے محاذ آرائی نہ کرنے کی بات سینئر ارکان نے بھی کی تو نواز شریف کو دکھ نہیں ہوا۔

اکسپرس نیوز کے مطابق چوہدری نثار نے مزید کہا کہ نوازشریف کو اپنے دکھ کا تو فوری احساس ہو جاتا ہے لیکن خود جو دکھ  وہ دوسروں کو پہنچاتے ہیں اس کا انہیں احساس نہیں ہوتا، انہیں قطعاً احساس نہیں کہ ان کی بہت سی باتوں سے شاید کسی اور کو دکھ پہنچا ہو، نوازشریف کے پیادے  گزشتہ 6 ماہ سے میرے بارے میں تضحیک آمیز پراپیگنڈا کر رہے ہیں، میرے متعلق لغو اور تضحیک آمیز پراپیگنڈے پر انہیں کوئی دکھ نہیں پہنچا۔