انسداد دہشت گردی کی عدالت نے عزیز، محمد عمر، نور اعظم اور نور محمد کو کو سزائے موت سنادی۔
اسلام نیوز کی رپورٹ کے مطابق، گلگت بلتستان کی تحصیل اشکومن میں لڑکے کے ریپ اور قتل کا جرم ثابت ہونے پر اے ٹی سی ون کے جج راجا شہزادہ نے مقدمے کا فیصلہ سنایا۔
واضح رہے کہ رواں برس فروری میں ساتویں جماعت کے 14 سالہ طالب علم دیدار حسین اغوا ہوئے تھے اور بعد ازاں کرمبر جھیل سے طالب علم کی لاش برآمد ہوئی تھی۔
دیدار حسین کی لاش ملنے کے بعد مقامی پولیس نے تصدیق کی تھی کہ قتل سے قبل لڑکے کا ریپ کیا گیا تھا۔
واقعے کی ایف آئی آر درج ہونے کے بعد مقامی پولیس نے 4 مشتبہ ملزمان عزیز، محمد عمر، نور اعظم اور نور محمد کو گرفتار کیا تھا جنہوں نے اپنا جرم قبول کیا تھا۔
مقدمے کی سماعت انسداد دہشت گردی کی عدالت نے کی اور ایک ماہ کے مختصر عرصے میں فیصلہ سنادیا۔
انسداد دہشت گردی کی عدالت نے شواہد اور گواہوں کے بیانات کی بنیاد پر فیصلہ سناتے ہوئے تمام ملزمان کو سزائے موت سنادی۔
عدالت نے تمام ملزمان پر فی کس 3 لاکھ روپے جرمانہ بھی عائد کیا ہے۔
