غیر سرکاری نتائج کے مطابق پارلیمانی انتخابات میں حزب اللہ اور امل اتحاد کو واضح برتری حاصل ہوئی ہے اور ملک بھرمیں جشن منایا جارہا ہے۔
تسنیم خبررساں ادارے نے المیادین کے حوالےسے بتایا ہے کہ حزب اللہ اور امل موومنٹ کے اتحاد الامل و الوفاء کے تمام امیدواروں نے پارلیمانی انتخابات میں کامیابی حاصل کی ہے۔.
لبنان کے وزیر داخلہ «نهاد المشنوق» Nohad Machnoukکا کہنا ہے کہ ووٹنگ کا تناسب 49.2 فیصد رہا۔
واضح رہے کہ لبنان میں پارلیمانی نظام حکومت قائم ہے اور صدر، وزیراعظم اور کابینہ کے ارکان کا انتخاب، پارلیمانی انتخاب پر منحصر ہوتا ہے، لہذا لبنان کے اقتدار اعلی میں پارلیمنٹ کو مرکزی اور کلیدی حثیت حاصل ہے۔
نئے انتخابی قوانین کے تحت ملک کے پانچ ریجنوں کو پندرہ انتخابی حلقوں میں تقسیم کیا گیا تھا اور ہر حلقے کی آبادی کے لحاظ سے نشستیں مقرر کی گئیں۔
خیال رہے کہ علاقے میں آباد نسلی اور مذہبی اکائیوں کو ان کی آبادی کے تناسب سے تقسیم کر دیا گیا ہے جس کا مقصد پارلیمنٹ کی 128نشستوں پر عیسائیوں اور مسلمانوں کو مساوی نمائندگی کا موقع فراہم کرنا ہے۔
دوسرے ملکوں میں مقیم لبنانی شہری پہلے ہی اپنے ووٹ کاسٹ کر چکے ہیں اور اس مقصد کے لیے متحدہ عرب امارات، عمان، سعودی عرب، قطر، کویت، مصر، امریکہ، کینیڈا، آسٹریلیا، آئیوری کوسٹ، نائیجیریا، برازیل ، برطانیہ اور فرانس میں قائم لبنانی سفارت خانوں میں ووٹ ڈالے گئے تھے۔
یاد رہے کہ لبنان میں آخری بار انتخابات جون سن دو ہزار نو میں ہوئے تھے اور موجودہ پارلیمنٹ کی مدت سن دو ہزار تیرہ میں ختم ہو گئی تھی، تاہم ملک کی مخصوص صورتحال کے پیش نظر پارلیمنٹ کی مدت میں تین بار توسیع کی گئی تھی۔
