اسرائیلی غاصب فوج نے فلسطین میں مظاہرین پر اندھا دھند فائرنگ کی ہے جس کے نتیجے میں 9 فلسطینی شہید اور متعدد دیگر شدید زخمی ہوگئے ہیں۔
اسلام نیوز کی رپورٹ کے مطابق اسرائیلی غاصب فوج نے فلسطین میں مظاہرین پر اندھا دھند فائرنگ کی ہے جس کے نتیجے میں 9 شہید اورخواتین اور بچوں سمیت متعدد افراد زخمی ہو گئے ہیں اور بعض کی حالت تشویشناک بتائی جاتی ہے۔
فلسطینی وزارت صحت کے ترجمان اشرف القدرہ کا کہنا ہے کہ صہیونی غاصب فوجی اہلکاروں نے مظاہرین پر فائرنگ کرکے ۹ کو شہید اور دسیوں نہتے مسلمانوں کوزخمی کردیاہے۔
ہزاروں فلسطینی مسلمانوں نے غاصب فوج کے خلاف مظاہرے کئے آل یہود نے مظاہرین پر گولیاں برسا کر درجنوں نہتے مسلمانوں کو خاک و خوں میں غلطاں کردیا۔
واضح رہے کہ فلسطین اور اسرائیل کے درمیان سرحد میں حماس کی جانب سے مختلف مقامات پر ہونے والے احتجاج کے دوران جب کشیدگی بڑھی تو مظاہرین نے پتھراؤ کیا جبکہ اسرائیلی فوجیوں کی جانب سے فائرنگ کی گئی۔
عینی شاہدین کا کہنا تھا کہ سیکڑوں فلسطینیوں کی جانب سے احتجاج کیا گیا اور اسرائیلی فوج سے تصادم ہوا جبکہ سرحد سے چند میٹر کے فاصلے پر پانچ مختلف مقامات پر ہزاروں کی تعداد میں مظاہرین جمع تھے۔
دوسری جانب سے اسرائیلی فوج کا کہنا تھا کہ ہزاروں کی تعداد میں فلسطینیوں نے ٹائرز کو نذر آتش کیا اور سرحد پر تعینات فوج پر پتھراؤ کیا جس کے جواب میں فوج کی جانب سے فائر کھول دیا گیا۔
خیال رہے کہ فلسطین میں صہیونی حکومت کے خلاف مظاہروں کے آغاز سے اب تک ۴۶ فلسطینی شہید اور 7000 سے زائد زخمی ہوچکے ہیں۔
