سرچ آپریشنوں کے دوران فائرنگ کے تبادلے میں دو مبینہ شدت پسند ہلاک ہوگئے
صوبہ بلوچستان کے دارالحکومت کوئٹہ میں سکیورٹی فورسز کی کارروائی میں دو مبینہ شدت پسند ہلاک ہوگئے ہیں جبکہ مختلف علاقوں میں سرچ آپریشن کے دوران 35 افراد کو حراست میں لیا گیا ہے۔
حکام کے مطابق شہر کے مختلف علاقوں میں ہونے والے سرچ آپریشنوں کے دوران کالعدم تنظیموں سے تعلق کے شبے میں 35 افراد کو گرفتار بھی کیا گیا ۔
یہ سرچ آپریشن شہر کے مختلف علاقوں میں گذشتہ روز ہونے والے خود کش حملے کے بعد کیے گئے جس میں فرنٹیئر کور کے تین اہلکاروں سمیت دس افراد ہلاک اور 40 زخمی ہوئے تھے۔
زخمیوں میں فرنٹیئر کور کے 15 اہلکار بھی شامل تھے۔
سرکاری ذرائع کے مطابق کوئٹہ میں سریاب اور اس کے متعلقہ علاقوں میں سرچ آپریشن کیا گیا۔ ان سرچ آپریشنوں کے دوران فائرنگ کے تبادلے میں دو مبینہ شدت پسند ہلاک ہوگئے۔
تاحال آزاد ذرائع سے ان افراد کی فائرنگ کے تبادلے میں ہلاکتوں کی تصدیق نہیں ہوسکی۔
سرکاری ذرائع کے مطابق سرچ آپریشن کے دوران 35 افراد کو گرفتار بھی کیا گیا جن سے تفتیش جاری ہے۔
ذرائع نے بتایا کہ سرچ آپریشنوں کے دوران اسلحہ و گولہ بارود بھی برآمد کیا گیا ہے۔
دوسری جانب خود کش حملے کا مقدمہ سول لائنز پولیس سٹیشن میں درج کیا گیا۔
ایس ایچ او کی مدعیت میں یہ مقدمہ نامعلوم افراد کے خلاف درج کیا گیا۔
واضح رہے کہ رواں سال کے دوران اب تک کوئٹہ شہر میں قانون نافذ کرنے والے اداروں پر دو خود کش حملوں سمیت چھ حملے ہوئے ہیں جن میں اب تک 25 سے زائد اہلکار ہلاک
ہوئے ہیں۔
sorce:محمد کاظم
بی بی سی اردو ڈاٹ کام، کوئٹہ
